Sowat drie honderd kinders van Charl Cilliers, 'n klein dorpie tussen Secunda en Standerton, is 'n week voor Kersfees by die Aquazone by Lake Umuzi in Secunda getrakteer.

Martie Smith en Rita Alexandrou is die groot beplanners agter dié partytjie. "Rita se ma (ook Rita) besit die Charl Cilliers-kontankwinkel. Dit is 'n jaarlikse tradisie dat die winkel die plaaslike kindertjies met 'n partytjie bederf, maar die geld is vanjaar min en die gemeenskap het uitgebrei," vertel Smith.  "Ons wil vir die kinders wys dat Jesus almal liefhet en Kersfees vir almal spesiaal moet wees, ongeag van jou status, geld of kleur."

Die personeel van die klein polisiekantoor op Charl Cilliers het ook betrokke geraak en die kinders van die plaaslike skooltjie is toe die Woensdag per bus na die waterfront aangery waar hulle geswem en in die Carnival Square baljaar het. Hulle is met koek, lekkergoed en geskenke bederf.

"Dit was ongelooflik om te sien hoe almal net ingespring en gehelp het. ," vertel Alexandrou.